Dan iyo Dareen waa buug akhristaha si heersare ah ugu soo warinaya in badan oo ka mid ah waayaha bulshada ee maanta. Waa dhigane, isaga oo adeegsanaya erayga dhigan, isku dayaya inuu dhaayaha akhristaha u soo dhaweeyo umuuro mudan in lagu baraarugsanaado. Waxa uu ka kooban yahay 25 qormo oo iskugu jira sheeko-faneedyo iyo maqaallo, dhammaantood faaqidaya hab-nololeedka bulshada.

Dhaqannada buuggu ka digayaa way badan yihiin, balse haddii aan si dul-ka-xaadis ah u tilmaanno waxa ka mid ah: tacabdiidka, haybsooca, iska fadhiga, u kala abtirinta inta dantoodu isku sidkan tahay, isku liska inta wada degan ama doodwadaagta ah, balwadaha, adeeg xumada, qorshe la’aanta iyo xil gudasho la'aanta heer walba. Dhaqannadan qormooyinku la dagaalayaan inta san ee ka soo horjeedda oo dhan buuggu waa dhiirigalinayaa. Wuxuu buuggu boorrinayaa oo u taagan yahay horumarka shakhsiga ah, ka qoyska, degmada ama dalka guud ahaan.